Arrasateko EAJ-PNVk udal gobernuari aurrekontu partehartzaileak berriro martxan jartzeko eskatu dio, aurreko legegintzaldietan herritarrei udal aurrekontuaren zati bat zuzenean kudeatzeko aukera eman zien ekimena. Talde jeltzaleak uste du 2023an egungo Gobernu Taldeak eten duen parte-hartze prozesu hau ezinbesteko eskubidea dela herritarrek udalerriko garapenean aktiboki parte hartu ahal izateko.

Aurreko legegintzaldietan, Arrasateko Udalak urtero 250.000 € bideratzen zituen herritarrek aukeratutako proiektuetarako, eta horri esker Txiki Txokoa gunea sortu, Pump Track gunea sortu, bizikletentzako garbiketa espazioak eraiki, Jose Luis Iñarra berritu, Zigarrolako begiratokia egin edota bidegorrian komunak ezarri ziren, besteak beste. Jeltzale ordezkarien ustez, inbertsio hauek ez dute bakarrik azpiegiturak eta zerbitzuak hobetzen lagundu, baizik eta udalaren eta herritarren arteko harremana indartu dute, erantzukizun partekatua eta udal erabakietan inplikazioa sustatuz.

Azken bi urteotan aurrekontu partehartzailerik izan ez denez, talde jeltzaleak udal gobernuari prozesua 2025ean berrabiarazteko eskatu dio eta, gainera, diru kopurua nabarmen handitzea proposatu du. "Udal aurrekontuak azken urteotan hazi egin dira, eta uste dugu partida honek hazkunde hori islatu behar duela", adierazi dute taldeko ordezkariek. Horregatik, partaidetza aurrekontuetarako urtero 400.000 € bideratzea proposatu dute, horrela proiektu zabalagoak garatu eta herritarren itxaropenak betetzeko aukera egongo litzatekeelako.

Partaidetza aurrekontuen eragina handitzeko neurri osagarri gisa, talde jeltzaleak auzo bakoitzean bilera irekiak antolatzea proposatu du, herritarrek beren kezkak eta proiektu proposamenak modu zuzenean aurkeztu ahal izan ditzaten. Taldearen ustez, horrelako bilerak ez ezik, elkarrizketa eta lankidetza giroan herritarren ekarpenak jasotzeko aukera ematen dute, udal aurrekontuen prestakuntza prozesua aberastuz.

Zarautzen ereduan oinarrituta, jeltzaleek Arrasateko puntu estrategikoetan postontziak ezartzea ere proposatu dute, herritarrek beren proposamenak modu errazean eta zuzenean udalari bidaltzeko aukera izan dezaten. "Bizilagun guztiei ahotsa eman nahi diegu, bereziki bileretara joan ezin diren baina Arrasate hobe bat eraikitzeko gogoa duten horiei", adierazi dute talde jeltzaleko ordezkariek.

EAJ-PNVk uste du partaidetza aurrekontuak udal bizitzan herritarren protagonismoa indartzeko eta inbertsioak benetako beharrei egokitzeko tresna garrantzitsua direla. Eremu honetan egungo gobernuak duen ekintzaren faltaren aurrean, taldeak praktika hau berraktibatzea eskatzen du, bizilagunei udalerriaren aurrerapenean erabakitzeko eta parte hartzeko bide eraginkor bat eskainiz.