Usurbilgo EAJ-PNVk agerian utzi du San Inazio kalearen eta Aitzezarra kalearen arteko segurtasunarekiko kezka, eta proposamena egin du berriro, udalerriko oinezkoentzako segurtasuna eta irisgarritasuna nabarmen hobetzeko.

Ekimen honek espaloiak zabaltzea eta zebrabide berri bat margotzea aurreikusten du. Helburu nagusia da mugikortasun segurua eta irisgarria bermatzea erabiltzaile guztientzat, Usurbilgo bizi-kalitatea nabarmen hobetuz.

Obra egiteko 12.000 euroko inbertsioa egitea aurreikusi da. Horri esker, oinezkoentzako ibilbide segurua gauzatu ahal izango da, EAJ-PNVk udalerriko bide-segurtasunarekin eta irisgarritasun unibertsalarekin duen konpromisoa azpimarratuz.

Aipatzekoa da proposamen hori 2024ko aurrekontuei emendakin formatuan egin zitzaiela, baina EH Bilduren Udal Gobernuak ez zuela onartu.

Usurbilgo EAJ-PNVko bozeramaile Xabi Otxoak adierazi du usurbildarren segurtasuna bermatzeko asmoa duela: "Proposamen hau Usurbil seguruago eta guztiontzako irisgarriago bat lortzeko aurrerapausoa da. Pena da 2024ko aurrekontuetan sartu ez izana, baina lanean jarraitzen dugu, eta gure bizilagunen bizi-kalitatea hobetuko duten proiektuak defendatzen. Segurtasuna eta irisgarritasuna gure udalerrian bermatu beharreko oinarrizko eskubideak dira".