EAJ-PNVk Arrasaten duen udal taldeak herriko garraio publikoaren zerbitzua hobetzeko proposamenak aurkeztu ditu, udal autobusen sistemak egun dituen erronka esanguratsuei aurre egiteko.

Gaur egun, zerbitzuak 2 autobus-linea ditu, eta astelehenetik larunbatera 4 autobusek ematen dute zerbitzua. Arazoen artean daude autobusak maiz ordezkatu behar izatea ibilgailu nagusietan matxurak direla eta, ordezko ibilgailurik ez izatea, eta irisgarritasun desegokia. Horren ondorioz, erabiltzaileek astelehenetik larunbatera solik eskaintzen den zerbitzu kaskarra jasotzen dute, igande eta jaiegunetan ez baitago martxan.

Egoera horren aurrean, eta Arrasateko bizilagunen kexak eta iradokizunak jaso ondoren, EAJ-PNVk autobus zerbitzuaren egungo kontratua etetea eta Arrasateko herritarren beharretara egokitutako zerbitzua bermatzeko hobekuntza nabarmenak izango dituen berria prestatzea proposatu du. Proposatutako hobekuntzen artean daude:

► Igande eta jaiegunetara hedatutako zerbitzua: Kontuan izanik funtsezko instalazioak, hala nola kiroldegia, beilatokia, Iturbide egoitza eta debagoieneko eskualdeko ospitalea igandeetan aritzen direla, funtsezkoa da egun horietan garraioa eskaintzea herritarren heltzea errazteko.

► Udala, Bedoña, Gesalibar eta Garagartza landa-auzoetarako taxibus zerbitzu bat ezartzea, Elgoibar bezalako beste udalerri batzuetako eredu arrakastatsuetan oinarrituta, eremu horien komunikazioa hobetzeko.

► Uda garaian kiroldegirako autobus zerbitzu berezi bat sortzea, eskaeraren gorakadari eta aparkalekuen saturazioari erantzuteko.

► Autobus-flota erabat berritzea: dauden 5 autobusak zero emisioko eredu baterantz eguneratzea eskatzen dute jeltzaleek, jasangarritasuneko eta ingurumen-kalitate hobeko politikekin bat eginez.

Ander Garay talde jeltzaleak Udalean duen bozeramailearen esanetan, "nahitaezkoa da Arrasateko garraio publikoaren zerbitzua modernizatzea, arrasatearren egungo eta etorkizuneko beharrei behar bezala erantzuteko. Proposamen horiek zerbitzuaren kalitatea hobetzeaz gain, guztiontzako garraio jasangarriago eta irisgarriago baten alde dugun konpromisoa islatuko dute, baita ingurumenean eragin positiboa izango duena ere, Arrasate jasangarriago bati bide emanez".

Ekimen horiekin, EAJ-PNV Arrasatek garraio publikoaren zerbitzua hobetzeaz gain, zerbitzu hori inklusiboa, eraginkorra eta ingurumenarekiko errespetuzkoa izango dela ziurtatzea espero du.