EAJ-PNVko ordezkaritza batek Palestinari elkartasuna adierazteko euskal kulturaren eremuko hainbat pertsona ezagunek deitutako manifestazioan parte hartu du gaur goizean, Donostiako Alderdi Ederreko lorategiak eta Haizearen Orrazia lotuz. Gipuzkoako diputatu nagusi Eider Mendozak, hiriko alkate Eneko Goiak, Madrilgo Euskal Taldeko diputatu Maribel Vaquerok eta Luke Uribe-Etxebarria senatariak, Giza Eskubideetako foru zuzendari Ion Gambrak eta Saioa Bandres eta Ianko Ganboa batzarkideak bat egin dute martxarekin, eta dei egin diete Nazio Batuei eta Europar Batasunari determinazioz esku hartu dezaten, su-eten iraunkorra lortu, okupazioa amaitu eta Gazatarren aurkako indarkeria eten ahal izateko.

Eider Mendozak, EAJ-PNVren ordezkaritzaren izenean, “erabateko gaitzespena” agertu du Israelek Gazaren aurka erakutsitako indarkeria indiskriminatu eta masiboaren aurrean, urriaren 7an jasan zituen Hamasen atentatuei erantzunez; erabat gaitzesten ditugun atentatuak eta eskalada honi hasiera eman ziotenak. Horren harira, Mendozak gogorarazi du beharrezkoa dela Hamasek duela 5 hilabete bahitu zituen pertsonak berehala askatzea. Gipuzkoako ahaldun nagusiak Gipuzkoako eta euskal gizartearen “haserre, min eta elkartasun sentimendu sakonarekin” bat egiten duela azaldu du Israelen erasoaldi militarraren ondorioz herri palestinarra pairatzen ari den “ankerkerien” aurrean. Kritikatu duenez, egoera hori “gero eta bidegabeagoa eta katastrofikoagoa” bihurtzen ari da, “bereizketarik gabeko bonbardaketekin, eteten ez diren bonbardaketekin, larriagotzen ari den krisi humanitarioarekin eta, are gehiago, nazioarteko laguntza-konboien aurkako erasoekin”.

Horregatik guztiagatik, Mendozak “Nazioarteko Zuzenbidera itzul dadila, eta nazioarteko ebazpenak eta Giza Eskubideak errespetatzera” itzultzeko eskatu dio Israelgo Estatuari, baita “su-eten iraunkorra, okupazioaren amaiera eta gazatarrek pairatzen ari diren krisi humanitario larriaren amaiera” ahalbidetzeko ere. “Gaur inoiz baino gehiago aldarrikatzen dugu Giza Eskubideen eta demokraziaren balio negoziaezina, pertsona guztien bizitza eta duintasunarekiko errespetua, bakean bizitzeko eskubidea, Palestinako eta Israelgo gizarteari dagokiena, eta Gazan, Palestinan, Israelen eta Ekialde Hurbil osoan egoera berri baterantz igarotzeko funtsezko oinarriak direnak”, adierazi du.

Gogorarazi duenez, EAJk gatazkari irtenbide iraunkorra ematea defendatzen du, israeldarren eta palestinarren bizikidetza baketsua ahalbidetzeko, Israelentzako muga seguruetan oinarrituta, 1967ko gerraren aurrekoetan oinarrituta, eta Palestinako herriak autodeterminaziorako eta estatu propioa sortzeko duen eskubidean oinarrituta. “Nazio Batuei eta Europa Batasunari esku hartzeko eskatzen diegu, su-eten bat lortzeko, herritarren sarraskia amaitzeko eta laguntza humanitarioko plan bat gauzatzeko. Nazioarteko komunitateak, bereziki Nazio Batuek eta Europar Batasunak, bakearen bandera altxatu behar du, eta hurrengo Nazioarteko Konferentzia bat bultzatu behar du, egungo indarkeriaren gorakada iraultzeko eta, 1948an Israelgo Estatua sortu zenetik, oraindik erantzunik aurkitu ez duen gatazka bati etorkizunean konponbide iraunkor bat emateko oinarriak ezartzeko”.