Udal gobernuari eskatzen diogu sar dezala Pasaia kalea berrurbanizatzea bere lehentasunen artean datozen hilabeteetarako. Izan ere, argi dago beharrezkoa dela Pasaia eta Errenteria kalearen inguruan esku hartzea, hainbat arrazoirengatik: kaleko saneamendua 60ko hamarkadan egin zen eta hornidurako hodiak ordezkatu behar dira. Gainera, kalearen konfigurazioak ez ditu betetzen irisgarritasun-estandarrak espaloien zabaleragatik, eta ez da bermatzen kalean oinezkoen joan-etorri segurua.

"Joan den maiatzean, Kalez-Kale programaren bigarren fasea Pasaia kalearen inguruan egiteko proposamena egin genuen. Bigarren fase horretan Mendelu Kalea, Llobregateko igoera Arkoll auzoan eta Higer bidean lanak proposatzen ziren.  2024ko aurrekontuan partida bat sartzeko eskatu genuen, baina ez zen onartu". Azken asteetan, udal-gobernuak hainbat auzotan egin dituen bileren testuinguruan, bizilagunek Pasaia kalean premiazko esku-hartzea eskatu zuten, baina ez zuten erantzun positiborik izan.

 Azken urteotan inbertsio handiak egin dira hirian, kale eta auzo iraunkorragoak, irisgarriagoak eta oinezkoentzako segurtasun handiagokoak sortzeko. Kalez-kale programaren bidez esku-hartze garrantzitsuak egin ziren Kosta kalean, Donosti kalean, Gibeletan, Harresilandan eta Sabino Arana kalean. Programari esker, espazio seguruagoak eta irisgarriagoak sortu dira oinezkoen eta bizikleten mugikortasunerako, eta hobekuntzak egin dira eskola-inguruneetan, herritarren bizi- kalitatea hobetzeko.

Pasaia kalearen ingurua prozesu horren bigarren fasearen parte zen, baina ikusten dugu egungo udal-gobernuak ez duela lehentasunen artean.

Herritarrek egindako eskaeragatik, saneamenduaren egoera txarragatik eta kale osoan irisgarritasuna bermatzeko beharragatik, udal gobernuari eskatzen diogu Pasaia kalearen ingurua berritzea bere lehentasunen artean sar dezala.

Datozen hilabeteetan gauzatu ahal izango den kreditu-aldaketak aukera ematen du Pasaia kalea berriritartzeko proiektua sartzeko eta Txingudiko Zerbitzuak, kaleko saneamendua berritzeko inbertsio-planean jasotzen duen partida gauzatzeko.