Oraingo honetan, prozesuarekin batera, azken asteetan Udala osatzen dugun taldeen artean izan den parte-hartze handia balioesten zuten diskurtsoak izan dira. Eta errealitatea da parte-hartze hori ekintzena baino gehiago hitzena izan dela. Udala osatzen dugun taldeok ekarpen ugari egin ditugu Abotsanitzen proposamena hobetzeko, baina gehienak baztertu egin ditu Gobernu taldeak.

Prozesuan argi ikusi duguna da EAJ-PNVri ekarpen kopuru txikiena onartu zaiola. Oposizioko lehen taldea gara, gobernu-taldeak baino zinegotzi bat gutxiagorekin, eta talde txikiena bezala tratatu gaituzte. Argi dago ez zela gure aldeko botoa Abotsanitzek lortu nahi zuena.

Hondarribiak inoiz izan duen aurrekonturik handiena izango du. Inolako ahaleginik egin behar izan gabe, gobernu-taldeak 4 milioi euro gehiago izan ditu diru-sarreretan, Foru Aldundiak udalerri bakoitzari egiten dion ekarpenetik, Udalak bankuetan duen diruzaintzako gerakinaren interesetatik eta kiroldegia zuzenean kudeatzeko diru-sarreren aurreikuspenetik datozenak.

Abotsanitzeko aurrekontuak EAJren gobernuak aurreikusita zituen auzo eta kaleetako hobekuntzak geldiarazten ditu. Arrantzale Auzoa, Pasaia kalea, Higer Bidea, Arkoll eta Mendelu aurrekontu horretatik kanpo geratu dira, nahiz eta EAJk horiek hobetzeko partidak eta ekimenak proposatu dituen. Abotsanitzek uko egin dio Kalez-kaleren bigarren fasean eta aurreko gobernu- taldeak proiektatutako urbanizazio-hobekuntzetan aurrera egiteari.

Abotsanitzek argi utzi du norekin adostu nahi zuen bere aurrekontua, eta EH Bilduri eman dio lehentasun osoa.

Baina, era berean, egiaztatu ahal izan dugu aurkeztutako aurrekontuak, alderdi askotan, aurreko urteetan egindako proposamenen ildo jarraituari eusten diola. Ez ziren orduan ikusarazi nahi zen bezain aurrekontu txarrak.

Horregatik, herritarrekiko dugun erantzukizunagatik eta hiriarentzat garrantzitsuak diren proiektuekin aurrera egiteko, gure botoa abstentzioarena izango da. Uste dugu koherentzia inoiz baino garrantzitsuagoa dela politikan, eta ildo eraikitzaile horretan kokatzen gara oposizioan.

EAJ-PNVk BI MOZIO AURKEZTU DITU

Lehenik eta behin, aurreko Osoko Bilkuran eztabaidatu ezin izan genuen proposamena eramango dugu, Israelen eta Hamasen arteko gerraren ondorioz Gazako zerrendan duela aste batzuetatik bizi den muturreko indarkeria egoerari buruzkoa. Hamasek urriaren 7an egindako eraso terrorista eta Israelen erasoek herritar zibilentzat eragin dituzten ondorio larriak gaitzestea proposatzen du mozioak.

Bigarrenik, zainketa-ereduari buruzko proposamen bat erregistratu dugu. Hondarribiko Udalak Euskadiko zainketen aldeko itun sozial berrian parte hartzeko konpromisoa hartzea proposatzen dugu, eta zaintza-sistema indartsu, eraldatzaile, komunitario eta feminista defendatzea. Pertsona erdigunean jartzera eramaten duten zortzi ardatz estrategikotan oinarritutako sistema.