EAJ-PNV Arrasatek, Ander Garay bozeramailearen eta Agurne Juldain zinegotzi jeltzalearen bitartez, prentsaurrekoa eskaini du EH Bilduren eta Elkarrekin Arrasateren gobernu berriaren lehen 100 egunak baloratzeko. Agerraldi horretan, legegintzaldiaren hasiera markatu duten erabaki eta gertaera esanguratsu batzuk nabarmendu dira. Arrasate EAJ-PNVren kezka eragin duen gaietako bat da EH Bilduren eta Elkarrekin Arrasateren gobernuak erabaki duela herritar guztientzako zergak eta tasak % 4 eta % 5 artean igotzea. "Igoera hori justifikazio argirik gabe eginda; izan ere, udalak zero zorra du eta diruzaintzako soberakin erabilgarria 4.500.000 eurokoa da", nabarmendu dute jeltzaleek.

Beste alderdi nabarmen bat batzordeen antolaketa da. Lehenengo 100 egunetan, ez da Hezkuntza, Belaunaldien arteko Harreman eta Kirol batzorderik deitu, eta Euskara Batzordearen kasuan, bilera bakarra bertan behera geratu zen deialdiaren erdian, batzordeko presidentea (EH Bildu) ez zegoelako bertan. "Sakonki baloratzen dugu batzordeen funtzionamendu eraginkorra; izan ere, informazioa partekatzeko eta proposamenak gobernu-taldearekin eztabaidatzeko aukera ematen digun tresna nagusia dira. Hala ere, batzordeen egungo funtzionamenduak hobekuntza esanguratsua eskatzen duela uste dugu", adierazi du bozeramaileak

Plan estrategikorik eza

Azpimarratu dute gobernua aurreko legegintzalditik abian zeuden proiektuak amaitzera bideratu dela, hala nola errugbi-zelaiko belar artifizialaren azalera berritzea eta Musakolako kiroldegiko aldageletako lurzorua eguneratzea. Hala ere, orain arte ez dute ekimen edo proiektu berririk hasi.

Ander Garay kezkatuta agertu da legegintzaldiko lehen hilabete hauetan gobernuak plan estrategikorik egin ez duelako: "ez dakigu zein izango den gobernuaren legegintzaldi honetako plan estrategikoa, lehen 100 egunetan ez baitugu horren garapenari buruzko berririk jaso. Arrasatearrei mesede egingo dieten proiektuak bultzatzeko plan estrategiko honetan laguntzeko prest agertu gara"

"EAJk legegintzaldi honetan esperientziadun 8 zinegotzi ditu, eta hasieratik oposizio eraikitzailea egin du, proposamenak aurkeztuz eta akordioak bilatuz. Datozen 4 urteetan jarrera horri eutsiko diogu, baina funtsezkoa da gobernuak bere funtzionatzeko modua aldatzea lankidetza sustatzeko", gaineratu du Garayk.

Jeltzaleak prest agertu dira eta udal gobernuari eskua luzatu diote akordio estrategikoetan laguntzeko, hala nola auzoen hobekuntzan, "auzoetako alkatetzetan aktiboki parte hartzen dihardugu eta", baita hezkuntza arloan ere, non eskoletako kontseiluetan parte hartzeko interesa agertu duten, udalaren izenean

EAJ-PNV Arrasatek legegintzaldiko lehen 100 egun hauetan egindako balorazioa "kritikoa" da, eta datozen hilabeteetan egoerak hobera egitea espero dute jeltzaleek.