Eneko Goia Donostiako alkatea pozik agertu da berriro hautatua izan delako, eta nabarmendu duenez, "urte garrantzitsuak ditugu aurretik, erronka handiz beteak. Gure helburua da Donostia bizitzeko, elkarbizitzeko, lan egiteko eta gozatzeko Europako hiririk onena izatea”.

Era berean, Donostiako alkateak azpimarratu duenez, "aldatzen ari den eta ziurgabetasun egoera etengabean bizi den mundu honetan hiri gisa erronka garrantzitsuei aurre egiten diegu, guztion artean Donostia gero eta hobea egiteko gai izan behar dugu. Hori da nire konpromisoa, eta ziur nago hemen gauden guztiona ere badela".

Era berean, Eneko Goiak nabarmendu du gure hiriak oinarri sendoak dituela erronka horiei aurre egiteko. “Pertsonak, donostiarrak, dira erdigunean egon behar dutenak.  Guztion artean lortu behar dugu bizi proiektu bat eraikitzeko aukera ematen duen hiria izatea”, azpimarratu du.

Hala, Goiak adierazi duenez, "gaur hasiko den legealdia hiria eraldatzeko legealdia izango da”, eta gaineratu du guztiok garela “garrantzitsuak etorkizuneko Donostia eraikitzeko. Donostiar adina Donostia daude, eta nire nahia eta ahalegina da guztion alkate izatea, beti hiriaren interesean lan egitea, entzuten, azaltzen, proposatzen eta adosten”.

Zentzu honetan, alkateak eskua luzatu die udal talde guztiei, “guztion lana delako behar dena. Nire nahia eta asmoa ahalik eta adostasun handienak eta zabalenak lortzea izango da. Hirirako ona delako”.

Amaitzeko, Goiak donostiar gisa harro dagoela adierazi du; “niretzat alkate izatea, lehenik eta behin, erantzukizun handia delako. Erantzukizuna eta, aldi berean, donostiar gisa, harrotasuna”.