Imanol Goenaga, EAJ/PNVko alkategaiak ondoain izeneko entzute aktiborako eta ideiak biltzeko plana aurkeztu du gaur arratsaldean bere taldearekin batera. Hautagaitza aurkeztu berritan, hautagai jeltzaleak adierazi zuen Andoainek bultzada berria eta programa zehatz bat behar dituela, eta, ildo horretan, funtsezkotzat jo zuen asmo handiko etorkizuneko proiektu bat izatea. Horretarako, ezinbestekoa da haren iritziz, “lehenik eta behin, andoaindarrei entzutea, ondoren udalerriaren erronka nagusiak elkarrekin identifikatzeko”. Hala, Goenagak berretsi duenez, "ez dugu abiadura erdian joango den herri bat nahi, aurrera egingo duen Andoain oparoa nahi dugu, inor atzean utzi gabe".

Ondoain ekimena, “ondo” eta “Andoain”-en arteko hitz-jokoaren emaitza, Santakruzeko kai-muturrean, Oria eta Leitzaran ibaien elkargunean, egin den topaketan aurkeztu da. Bertan, Goenagak Andoaingo elkarte, erakunde eta kolektibo nagusien eskaera eta beharrizanetako batzuk jasotzen dituen dokumentua osatzen ari direla aurreratu du. Lan-dokumentu ireki eta bizia da, iradokizun era ekarpen berriak jasotzeko prest.

Jeltzaleen proposamenak 99+1 funtsezko ideia izango ditu Andoainek aurrera egin dezan, eta, ildo horretan, Goenagak adierazi duenez, "prozesu honekin sinbolizatu egin nahi da andoaindar bakoitzak ekarpenak egiteko duen aukera". "Pertsona bakoitza ideia bat da, Andoain eraldatzeko, hobetzeko eta aurrera egiteko funtsezko proposamen edo ekimen berri bat", esan du hautagaiak. Horregatik, andoaindarren ideia guztiak entzun eta idatzi nahi dituzte, "proiektu handiak eta ekimen txikiak". “Mezu guztiak beharrezkoak dira, eta azkenean onartuko dugun etorkizuneko ibilbide-orria proiektu partekatua izango da”, amaitu du Imanol Goenagak.

Halaber, EAJ-PNVren Andoaingo alkategaiak lehentasuntzat jo du ahalik eta eskuragarriena izatea momentu honetan, hain zuzen, parte hartu, iritzia eman edo hitz egin nahi duen pertsona bakoitzari arreta emateko. Ildo horretan, www.imanolgoenaga.eus webgunea ireki du, komunikazio-bideak ezartzeko.

Honekin guztiarekin batera, Imanol Goenagak EAJ-PNVk defendatzen duen etorkizuneko Andoain modernizatu eta eraldatzeko lehentasunezko bost jarduera-eremuak eta funtsezko ardatzak ezarri nahi izan ditu bere aurkezpenean:

• Ekonomia sendo eta bizia. Ehun ekonomiko indartsua behar dugu, industria-jarduera berriak ezartzea, hirigintza-politika proaktiboekin. Tokiko merkataritza eta gure ostalaritza babestuko ditugu lehentasunez, gizarte-ehunari eta gure bizi-planari ematen dioten balioagatik.

• Auzoetako bizitza erdigunekoa bezain beste lehenestea. Ama Kandida 400 etxebizitzarekin birsortzea, Ziako erreka bideratzea, Etxeberrietaren eraldaketa sustatzea, egoiliarren arazo eta beharrei erantzunez, Iztuitzagarako irtenbide bat eskaintzea Karrika trakzionatzeko edo mugikortasuna eta aparkatzea hobetzeko, 440 aparkaleku sortuz.

• Andoain erreferentzia berdea. Leitzaranen ibai-parke berri bat bultzatu nahi dugu, papelera eraitsi, lurzorua deskontaminatu igerileku naturalak, kirol-arrantzarako guneak eta kanpaldia sortzeko. Erriberako pasealekuak lotuz zirkuitu bat osatzea proposatzen dugu, edo Lasarte-Oriarekin N-I errepidetik lotuko gaituen bidegorri bat sustatzea.

• Gizarte-politiketan erreferentzia izatea. Jarrai dezagun herri solidario eta abegikorra izaten; harrera- eta egokitze-protokoloak garatuko dituen kultur aniztasunerako zerbitzu bat sortzea proposatzen dugu. Lehentasunezkoa da familia-bizitzaren eta zainketen beharrei erantzutea. Kontziliazioa, haurtzaindegiaren doakotasuna, Ondarretako jolastoki inklusiboa erraztea, parkeak estaltzea. Segurtasuna bermatzea, kaleko zaintza hobetuz eta eremu ez-seguruak kenduz.

• Euskal kulturaren eta nortasunaren aldeko apustu garbia. Aisialdian eta kirolean ekimen berritzaileak abian jartzea, gazteen artean euskara sustatzeko. Andoain, garai batean, sorlekua, motorra eta erreferentzia izan zen gure kultura eta nortasunaren garapenean. Gaur berriro izan behar dugu, ekimen berriak abian jarrita.