“EAJ-PNV batzarkide taldeak oso positibotzat jo du Gipuzkoako Batzar Nagusiak osatzen ditugun talde politiko guztiek Lan Mahai Politikoaren inguruan elkarrekin egindako lana. Era berean, eskerrak eman nahi dizkiegu gizarte eragile, sindikatu, empresa arloko sozietate eta GKE guztiei, prozesu osoan zehar parte hartzeagatik eta egindako ekarpenagatik. Azken finean, Lan Mahai Politikoa partaidetza prozesu anitza da, partaidetza-lankidetza binomioa gobernantza eredu baten ardatz duena. Eredu honek, gure lurraldearen errealitate sozio-ekonomikoaren ikuspegi zabala ematen digu, eta gure herritarren benetako kezka eta beharretara hurbiltzen gaitu”, adierazi du Maria Eugenia Arrizabalagak, EAJ-PNV bozeramaile Gipuzkoako Batzar Nagusietan. Pandemiak eta ondorengo ziurgabetasun egoerak ez zuten atzerapausorik ekarri, eredu parte-hartzaileen aldeko apustua baizik. Izan ere, EAJ-PNVko batzarkide taldean, ekintza politikoa gure lurraldearekin partekatutako eta konprometitutako proiektu gisa ulertzen dugu. Partaidetza baita gure eredu sozioekonomikoaren oinarri den balioetako bat.

Mahai Politikoa 2020an eratu zen, pandemiak Gipuzkoan izango dituen ondorio sozial, ekonomiko eta politikoei buruzko diagnostiko estrukturala egiteko eta diagnostikoa egin ondoren, Gipuzkoak etorkizunean izango dituen erronka nagusiak ezartzeko. Ildo honetan, nabarmentzekoa da partaidetza-prozesuan zehar egindako ekarpenen maila handia; izan ere, gizarte babesa, zaintzak, gizarte justizia eta desberdintasuna, gazteen etorkizuneko alderdiak, fiskalitatea, garapen ekonomikoa, klima-aldaketaren aurkako borroka eta ingurumena jorratu baititugu. Ganberako talde politikoek,  98 proposamen baino gehiago egin dituzte eta guztira, 46 proposamen onartu dira. Datu honek argi erakusten du lortutako adostasun maila handia, baita mahaian egindako ekarpenen maila handia ere.

Onartutako proposamenen artean, azpimarratzekoak dira, gazteen etorkizunaren esparruan, haur eta nerabeentzako zerbitzuen inplementazioa, bai eta gazte, teknikari eta politikariekin partekatutako eta adostutako gazte zerbitzuaren eredu bat izateko helburuan aurrera egitea ere. Zainketen arloan, zaintzaileentzako baldintza duinetako enplegu estrategia bat garatzea, etxean arreta eta zaintza emateko eredu berri bat diseinatzea eta testatzea, zaintzetan teknologia berrien erabilera bultzatzea pertsonen intimitatea bermatuz, zainketen finantza-iraunkortasuneko politikak aztertzea eta proposatzea, zaintza informalari eusteko estrategia bat garatzea, partaidetzazko ebaluazio-prozesuak garatzea edota etorkinak gizarteratzeko politikak gainbegiratzea edo garatzea. Garapen ekonomikoaren atalean, Gipuzkoako ehun ekonomikoaren lehiakortasuna areagotzeko estrategiak bultzatzea onartu da. Klima-aldaketaren aurkako borrokari dagokionez, hazkunde ekonomiko iraunkorrerako estrategia, ekonomia zirkularraren edo bidezko trantsizio energetikoaren bidez: komunitate eta kooperatiba energetikoak.

Laburbilduz, Lan Mahai Politikoa gure gizartearen alderdi guztiak biltzen dituen proposamen sorta zabalarekin, etorkizuneko Gipuzkoa eraikitzen lagunduko digun epe luzerako proiektu parte-hartzaile eta kolaboratiboa da,  gure herritarren benetako kezka eta beharretara hurbiltzen gaituena.