Urnietako Uri Buru Batzarrak haren izendapena aho batez onartu eta gero, gaur egin den agerraldi publikoan eman du jakitera hautagaitza UBBko buru den Amaia Vaquerok.  Jorge Seguradok 20 urte baino gehiago eman ditu aparejadore eta eraikuntzako ingeniari lanetan, 2020 urtean udaletxean eta alkate moduan buru-belarri lanean sartu den arte. Mikel Pagola alkate ohiaren lekukoa hartu aurretik, 2015urtetik zinegotzi gisa jardun zen, Hirigintza gaietako arduradun lanetan.

Esker oneko hitzekin, EAJ-PNVko alkategaiak “Alderdiak, Gipuzko Buru Batzarrak eta urnietarrek berarengan jarritako konfiantza” azpimarratu nahi izan du eta honela berretsi du bere konpromisoa: “Emandako aukera eta konfiantza hau, datorren maiatzeko hauteskundeetan emaitza on batzuekin itzultzeko asmoa dut”. Jarraian, “Urnietaren eta urnietarren alde egiten duen herri-proiektua garatzen jarraitzeko gogoz eta ilusioz” aurkitzen dela erantsi du.

Halaber, legealdi honen hasieran lekukoa hartu zion Mikel Pagola alkate ohiarentzat ere esker eta miresmen hitzak izan ditu Jorge Seguradok. Baita, “uneoro alboan” izan duen eta “bere onena eman duen” udal taldearentzat ere. Izan ere, “pandemia baten erdian arazo eta beharrei aurre egiteko gaitasuna erakutsi du EAJk Urnietako udaletxean” eta, horrela, “herriarentzat egokienak diren erantzunak ematen” jarraituko dutela agindu du, “herri proiektu sendo batekin”. “Lanean jarraituko dugu, etorkizunari begira, hobetzen jarraitzeko, herritarrekin batera erronkei ahalik eta erantzunik egokienak  aurkitu ahal izateko eta harro gauden herri baten parte izaten jarraitzeko”, esan du Seguradok.