Tokiko Gobernu Batzordeak onartu du gaur Illunbeko lurzatien salerosketa kontratua berritzea, hirigintza eremu hori etorkizunean eskuratzeko baldintza berriak finkatzen dituena. Kontratu berriaren helburua, aldi baterako enpresa-elkarte esleipen-hartzailearekin adostua, jatorrizko proiektuaren erabilerak birdimentsionatzea da, merkataritza-eredua gaindituz. Horretarako, eredu hori gauzatzeko behar den epea luzatzen da, konplexua erabilera berrietara egokitzeko beharrezkoak diren administrazio-izapideak formalizatu ahal izateko, gaur egun indarrean dagoen hirugarren sektoreko kalifikazioaren barruan.

Udalak, 2016. urtean onartu zuen Illunbeko bi lurzati besterentzea Larrain, SL eta Loiola Gestión Inmobiliaria, SL enpresei, 22 milioi eurotan (17 dirutan eta 4,9 esparrurako sarbideak hobetzeko obrak egiteko).

Aldeen arteko elkarrizketen ondorioz, Udalak uste du interes publikoa dagoela salerosketa-kontratua aldatzeko.

Alde batetik, kontuan hartu da gaur egungo testuinguruan ezinezkoa dela erosleek hasieran planteatutako mix komertzialaren jatorrizko proiektua garatzea. Bestetik, Udalak uste du alokairu eskuragarrirako coliving etxebizitzen proiektua bultzatzeko proposamena interesgarria izan daitekeela, alokairu-parkerako eta alokairuaren batez besteko preziorako. Gainera, kontratu berrian, esleipendunak konpromisoa hartzen du Miramongo Parke Teknologikoarekin bateragarriak diren espazioak eta jarduerak garatzeko aukerak aztertzeko. Aukera hori interesgarria da, hirigintza-eremu hori parke zientifikoaren etorkizuneko hedapenarekin lotzen baitu.

Gainera, Udalak uste du planteamendu horrek Donostia Arena esparruaren prestazioak eta erabilera hobetzen  lagundu dezakeela (salerosketa-kontratuan ez dago sartuta); izan ere, ingurua urbanizatzeak lagundu dezake egungo pabiloiko sarbideak eta ebakuazio-irteerak hobetzen, eta horrek eragina izango du etorkizunean erabilera anitzeko esparru gisa izango dituen baldintzak hobetzen.

Horrekin batera, lurzati batean supermerkatu bat kokatzeko enpresa erosleen proposamenari eusten zaio.

Horrek esan nahi du planeamendurako tresna berriak tramitatu eta eraikuntza- eta jarduera-lizentzia berriak eskatu behar direla. Hori dela eta, bi aldeek, ados jarrita, urte batez atzeratu dute salerosketako eskritura publikoa formalizatzeko epea (sei hilabetez luza daiteke).

Atzerapen horren ordain gisa, erosleek 620.730 euro ordainduko dituzte, eta kopuru proportzionala, atzerapen hori beste sei hilabete luzatzen bada (diruaren legezko prezioari dagokiona, eskrituraren sinadura atzeratzen den denboran). Gainera, kontratua arautzen duten baldintza-agiriko klausulak aplikatuz, Udalak fidantza gisa ezarritako bermea konfiskatuko du, azkenean jatorrizko kontratuaren baldintzak aldatzen badira (340.000 euro).

Hori guztia bat dator legezko aurreikuspenekin eta jatorrizko kontratuan jasotako baldintzekin, eta ez dakar bi hirigintza esparruen kalifikazioa aldatzea, hirugarren sektoreko kalifikazioari eutsiko baitiote eta ez dira inola ere etxebizitza bihurtuko.