Andoaingo Udalak martxan ipini du Goiburu auzoan hondakinen bilketarako edukinontzi puntu berria, zehazki frontoiaren atzeko aldean kokatzen delarik. Edukinontzi irla berri honek, hondakinen bereizketa integrala egitea ahalbidetuko du (organikoa, errefusa, beira, papera, plastikoa). Izagirre zerbitzu zizengotziaren iritziz “Andoaingo Udaletik hirigunean ematen diren zerbitzu aukerak auzune ezberdinetan berdindu ahal izateko ahalegina egiten ari dira”.

Izagirrek adierazi duenez bi helburu nagusi bilatzen dira: “alde batetik, auzo ezberdinen eta hirigunearen artean egon daitezkeen desorekak ekiditea, guztiei ahalik eta kalitatezko zerbitzu onena eskaini ahal izateko, eta bestalde, hondakinen bereizketan hobetzea, birziklatze tasa ahalik eta altuena lortzeko, %70eko langa gainditzeko”.

Organikoa eta errefusaren ontziak ireki ahal izateko ezinbestekoa izango da txartela. Horregatik, Goiburu auzoko bizilagunek Ambrosia Olabide zentrora gerturatu beharko dute txartela eskuratu ahal izateko. Hondakinen bilketa sisteman altan eman eta txartela lortzeko ordutegia goizeko 9:00etatik 13:00etara bitartekoa da.

Azkenik, gogorarazten da dimentsio handiko hondakinen bilketa astearte goizetan egiten dela, eta horregatik astelehen gauetan atera daitezkeela bolumen handiko hondakinak edukinontzien bilketa puntura. Bestalde, andoaindarrek eskuragarri dute hondakin horiek zuzenean Garbigunera eramateko aukera, zerbitzua doakoa da eta honako ordutegia dauka: astelehenetik ostiralera 9:00-12:00 bitartean goizez eta 16:00-19:30 arratsaldez. Larunbatetan,  9:00-13:30 bitartean.

Andoaingo Udalak gogorarazten du guztion ardura dela hondakinen kudeaketa arduratsua egitea, bereizketa ahalik eta eraginkorrena egitea eta herria garbi mantentzea.