Iñigo Barandiaranek, EAJ-PNVren Euzko Abertzaleak legebiltzar taldean haurtzaroari buruzko gaietarako bozeramaileak, Osoko bilkuran azaldu du gaur “lehen mailako arazotzat” jotzen duela Estatuan bizi diren Lagundu gabeko Adingabe Atzerritarren egoera kezkagarria. Diputatu jeltzaleak gai honi buruz galdetu dio Osasun, Gizarte Zerbitzu eta Berdintasun Ministro andreari, eta “berehala” arazoa konpontzeari ekitea eskatu dio “egoera, premiazkoa dena, atzeraezin bihurtzen hasia delako”.

Eman duen azalpenarekin, Barandiaranek kritikatu du adingabeak babesteko araudia eta esan du Lagundu Gabeko Adingabe Atzerritarrei dagozkien jarduerei buruzko Protokoloa “eztabaida honetan aztertzen ari garen errealitateak” gainditu duela, “Lagundu gabeko Adingabe Atzerritarren kopurua nabarmen hazi delako migrazio fenomenoaren ondorioz”. Adingabearen interes gorena oinarritzat hartuta, diputatu jeltzaleak aldeztu du Adingabe hauen lege arauketa moldatzea Protokoloa “eraginkorragoa izan dadin eta Protokolo hori ez betetzeagatik adingabearen eskubideen urraketa gerta ez dadin”.

Zentzu berean, Barandiaranek baieztatu du Lagundu gabeko Adingabe Atzerritarren arazoa “ekitatearekin” konpondu behar dela “aplikazio irizpideak neurtuaz, erantzukizunak administrazio ezberdinen artean banatzeko”. Diputatu jeltzaleak adierazi duenez “administrazio batzuek ahalegin neurrigabea egiten dute eta horrek adingabeak artatzeko aukerak kaltetzen ditu eta, ondorioz, ordenamendu juridikoan ezarritako helburuen betepena ere”.

Iñigo Barandiaranek era berean salatu ditu Espainiako exekutiboak gobernuen arteko koordinazio esparruan dituen gabeziak, eta besteak beste aipatu ditu Osasun, Gizarte Zerbitzu eta Berdintasun Ministerioa, Barne Ministerioa eta Justizia, Kanpo Ekintza eta Enplegu,Lankidetza eta Gizarte Segurantza Ministerioak. Dolors Montserratek zuzentzen duen ministerioaren ekimen arautzailerik eta koordinaziorik eza kritikatzeaz gain, Barandiaranek “zorroztasun eta diligentzia handiagoak” eskatu ditu, besteak beste adingabea antzematen denean egin behar den erregistroari dagokionez. Justiziaren alorrean, diputatu jeltzaleak “irizpide komunak” eskatu ditu adingabea zaintzeari eta tutoratzeari dagokionez eta Kanpo Ministerioari zuzendutako kritikarekin adierazi du ez dituela legeak eta nazioarteko hitzarmenak betetzen “familiak berriz elkartzeko printzipioari dagokionez”.

Horregatik guztiagatik eta Euzko Abertzaleak taldeak adingabeen eskubideak babesteko eta Lagundu Gabeko Adingabe Atzerritarrek gaur egun bizi duten egoera kezkagarria konpontzera begira, Osasun, Gizarte Zerbitzu eta Berdintasun Ministro andreari eskatu dio esparru arautzailean urratsak ematea eta gobernuen arteko koordinazioa hobetzea.