EAJ-PNVko udal taldearen arabera, Bilduk eta bereziki Pasaiako alkateak, hainbatetan erakutsi dute akordioetara iristeko eta elkarlanerako duten gaitasun falta, batez ere beraiek gobernuan ez dauden erakundeekin. “Hori dela eta dago Pasaia dagoen egoeran; udal gobernuak ezarri dituen zailtasun eta oztopo guztien ondorioz ez da akordio ez eta batasunik lortu Pasaia biziberritzeko” adierazi du Oterminek. Pasaitarrek egunero pairatu behar dute egoera hau, eta bozeramaile jeltzaleak gogorarazi nahi izan du, Pasaia Gipuzkoako udalerririk degradatuena dela, langabezia-tasa altuarekin eta zoritxarrez, bizi duen utzikeria eta gainbehera egoera geroz eta larriagoa da.

Egoera honen aurrean, EAJ-PNVk azpimarratu du elkarlanerako, elkarrizketarako eta aurrera pausoak emateko garaia dela, ezinezkoa baita ezer lortzea oinarri gisa etengabeko konfrontazio politika hartuta.

Horregatik, Oterminek Agirregabiria alkateari eskatu dio alde batera uzteko “etengabeko liskarrak” eta Pasaiako egoera hobetzen lagun dezaketen erakunde desberdinekin bildu eta hitz egiteko eskatu dio, hala nola Aldundiarekin edota Eusko Jaurlaritzarekin, akordioetara iritsi, hitzarmenak sinatu eta Pasaiak bizi duen egoera hobetzen lagunduko duten ekimen desberdinak aurrera eraman ahal izateko.