Bozeramale jeltzalearen iritziz, gure hirian birziklatze-tasei “bultzada erabakigarria” emateko “aukera aparta galdu da”, Bilduk hasieran bosgarren edukiontzia erabat errefusatu zuelako, eta hori jartzerakoan izan duen moteltasunagatik. “Galdu ditugun hiru urteotan, birziklapen maila bikain hazteko aukera emango zigun bosgarren edukiontziaren aldeko apustu garbiak, Bilduk 2016rako lortu nahi duen %60 inguru horretara iristeko modukoa. Beren propaganda guztiak ezin du gauza bat estali eta da, 2011tik 2014ra %30eko birziklapen tasan gelditurik egon garela, Bilduk azkenean ezarri behar duen sistema bera onartzeko izan duen jarrera itxiagatik bakarrik”.